Skip to main content

autizmi.net

Menu
DHURONI TANI

Programi i Logopedisë (Terapisë së të Folurit dhe Gjuhës)

Programi i Logopedisë në Shoqatën “AUTIZMI” ofron shërbime të specializuara për vlerësimin, ndërhyrjen dhe zhvillimin e aftësive të komunikimit, gjuhës dhe të folurit tek fëmijët me Çrregullim të Spektrit të Autizmit dhe çrregullime të tjera të komunikimit. Programi bazohet në praktika të mbështetura në evidencë shkencore dhe në plane të individualizuara terapeutike, të përshtatura sipas nevojave dhe potencialit të secilit përfitues.

Pas vlerësimit fillestar, hartohet një plan individual i ndërhyrjes, i cili synon zhvillimin e aftësive gjuhësore dhe komunikuese në mënyrë funksionale, duke mbështetur pjesëmarrjen aktive të fëmijës në familje, shkollë dhe komunitet.

Programi i Logopedisë fokusohet në:

  • Zhvillimin e komunikimit receptiv dhe ekspresiv.
  • Stimulimin e zhvillimit të hershëm të gjuhës.
  • Zhvillimin e komunikimit verbal dhe alternativ, sipas nevojave të fëmijës.
  • Përmirësimin e artikulimit dhe qartësisë së të folurit.
  • Zhvillimin e komunikimit pragmatik dhe aftësive sociale të komunikimit.
  • Pasurimin e fjalorit dhe zhvillimin e strukturës gjuhësore.
  • Përmirësimin e aftësive të dëgjimit aktiv, të kuptuarit dhe ndjekjes së udhëzimeve.
  • Mbështetjen e aftësive parashkollore dhe shkollore që lidhen me gjuhën, leximin dhe shkrimin.

Klasat e Logopedisë

Me katër Qendra të shtrira në zona të ndryshme të Kosovës, Prishtinë, Prizren, Podujevë dhe Lipjan, dhe përmes Projekteve edhe në Komunën e Gjlanit, ne ofrojmë shërbime profesionale dhe të specializuara për autizmin më pranë familjeve që kanë nevojë për mbështetje. Përmes një qasjeje gjithëpërfshirëse dhe të bazuar në nevojat individuale të fëmijëve, dhe të personave me autizëm, ne synojmë të rrisim qasjen në shërbime cilësore terapeutike, të mbështesim zhvillimin e tyre dhe të fuqizojmë familjet në komunitetet ku jetojnë.

Klasa Logopedike për Intervenim dhe Zhvillim të Hershëm Gjuhësor

Kjo klasë është e dedikuar për fëmijët në fazat e hershme të zhvillimit, të cilët kanë nevojë për mbështetje në komunikim dhe gjuhë. Programi synon të nxisë zhvillimin e komunikimit të hershëm, gjuhës receptive dhe ekspresive, zgjerimin e fjalorit, përmirësimin e artikulimit dhe ndërtimin e aftësive bazë të komunikimit funksional. Ndërhyrja realizohet gjatë periudhës më kritike të zhvillimit gjuhësor, duke krijuar bazat për të nxënit, ndërveprimin social dhe zhvillimin e mëtejshëm gjuhësor.

Klasa Logopedike për Zhvillimin e Komunikimit Social dhe Pragmatik

Programi është i fokusuar në zhvillimin e komunikimit social dhe përdorimin funksional të gjuhës në situata të ndryshme të jetës së përditshme. Objektivat përfshijnë zhvillimin e aftësive për inicimin dhe mbajtjen e bashkëbisedimit, kuptimin dhe përdorimin e rregullave sociale të komunikimit, interpretimin e gjuhës joverbale, kuptimin e emocioneve dhe perspektivës së tjetrit, si dhe përshtatjen e komunikimit sipas kontekstit. Kjo ndërhyrje kontribuon në rritjen e kompetencave sociale dhe përmirësimin e cilësisë së ndërveprimeve me familjen, bashkëmoshatarët dhe komunitetin.