Skip to main content

autizmi.net

Menu
DHURONI TANI

Shoqata "Autizmi" Prishtinë

Shoqata “AUTIZMI” është themeluar në nëntor të vitit 2011 dhe që nga themelimi i saj, është angazhuar në vazhdimësi në ofrimin e mbështetjes për fëmijët me autizëm dhe çrregullime të tjera neurozhvillimore, si dhe për familjet e tyre. Për 15 vite aktivitet, Shoqata është zhvilluar në një Qendër referente të specializuar, duke ofruar shërbime profesionale, multidisiplinare dhe të bazuara në praktikat dhe standardet bashkëkohore ndërkombëtare për: vlerësimin, trajtimin dhe rehabilitimin e personave me autizëm. Përmes një qasjeje të individualizuar dhe bashkëpunimit të ngushtë me familjet, institucionet dhe komunitetin. Shoqata “AUTIZMI” synon të fuqizojë aftësitë e çdo fëmije, të promovojë përfshirjen sociale dhe të kontribuojë në përmirësimin e cilësisë së jetës së personave me autizëm në Kosovë.
  • Rreth nesh

Ne ndodhemi në Prishtinë, në Rr. Joni p.n. Kalabri, ku kemi krijuar një mjedis të sigurtë, gjithëpërfshirës dhe të përshtatur për nevojat individuale zhvillimore të fëmijëve me autizëm dhe çrregullime zhvillimore që mbështesim. Përmes programeve tona gjithëpërfshirëse, ne ofrojmë shërbime të specializuara për: vlerësim, trajtim, rehabilitim, stimulim dhe zhvillim, me synimin për të nxitur potencialin e çdo fëmije dhe për të përmirësuar cilësinë e jetës së tij. Puna jonë bazohet në një qasje multidisiplinare, që adreson zhvillimin fizik, njohës, social, emocional, psikologjik dhe funksional të fëmijës, duke promovuar njëkohësisht përfshirjen aktive në familje, shkollë dhe komunitet.

  • Misioni ynë

Ne ofrojmë shërbime cilësore, profesionale dhe të bazuara në evidenca shkencore për fëmijët me autizëm dhe çrregullime të tjera neurozhvillimore, duke mbështetur kështu zhvillimin e potencialit të tyre dhe duke fuqizuar familjet në çdo etapë të procesit të trajtimit dhe rehabilitimit.
Për të përmbushur këtë mision, ne synojmë që përmes punës e angazhimit tonë të përditshëm të mundësojmë:

• Ofrimin e ndërhyrjeve të hershme terapeutike dhe të individualizuara, të përshtatura sipas nevojave të secilit fëmijë.

• Ofrojmë terapi të specializuara, duke përfshirë ABA/VB, DIR Floortime, logopedi dhe ergoterapi, të përshtatura sipas nevojave individuale.

• Mbështesim prindërit dhe familjet përmes vizitave në shtëpi (Portigj), këshillimit profesional, trajnimeve dhe edukimit të vazhdueshëm.

• Agazhohemi që të rrisim ndërgjegjësimin e shoqërisë për autizmin, duke promovuar mirëkuptimin, pranimin dhe përfshirjen e personave me autizëm në shoqëri.

• Nxisim integrimin social, zhvillimin e pavarësisë dhe përmirësimin e cilësisë së jetës së fëmijëve dhe personave me autizëm dhe familjeve të tyre.

  • Vizioni ynë

Krijimi i një shoqori gjithëpërfshirëse, ku çdo fëmijë me autizëm ka qasje të barabartë në shërbime cilësore terapeutike, edukative dhe sociale, të cilat mbështesin zhvillimin, mirëqenien dhe potencialin e tyre.
Ne synojmë një shoqëri ku diversiteti neurozhvillimor pranohet, respektohet dhe vlerësohet, ku personat me autizëm dhe familjet e tyre marrin mbështetjen e nevojshme, ndihen të përfshirë dhe kanë mundësi të barabarta për një jetë të pavarur dhe dinjitoze.

  • Vlerat Tona
Çdo gjë që bëjmë në Shoqatën “AUTIZMI” udhëhiqet nga këto vlera thelbësore:
01
Profesionalizmi
Ne angazhohemi që të gjitha shërbimet tona të ofrohen nga profesionistë të kualifikuar dhe të përkushtuar, duke u mbështetur në praktika bashkëkohore, metoda të bazuara në evidencë shkencore dhe standarde profesionale të fushës së autizmit dhe zhvillimit të fëmijëve. Duke punuar në ngritjen e kapaciteteve të stafit, ne u kushtojmë rëndësi të veçantë zhvillimit të vazhdueshëm profesional, synojmë të ofrojmë mbështetje cilësore, të individualizuar dhe të përshtatur me nevojat unike të çdo fëmije.
02
Individualiteti
Çdo fëmijë është unik dhe ka potencialin e tij të veçantë për zhvillim. Për këtë arsye, programet dhe ndërhyrjet tona hartohen duke u bazuar në nevojat individuale, aftësitë, interesat dhe pikat e forta të secilit fëmijë. Qasja jonë e personalizuar respekton ritmin e zhvillimit të çdo përfituesi, duke synuar përparim funksional, rritje të pavarësisë dhe përmirësim të cilësisë së jetës.
03
Përkushtimi
Ne punojmë me përkushtim, dashuri, profesionalizëm, disiplinë në punë, duke u angazhuar çdo ditë për të mbështetur zhvillimin dhe mirëqenien e çdo fëmije. Ne besojmë në potencialin unik të secilit fëmijë dhe krijojmë mundësi që ata të zhvillojnë aftësitë e tyre, të arrijnë objektivat individuale dhe të përparojnë drejt një jete sa më të pavarur dhe funksionale.
04
Bashkëpunimi me familjen
Familjen e konsiderojmë partner të rëndësishëm dhe të pazëvendësueshëm në procesin e zhvillimit dhe mbështetjes së fëmijës. Përmes bashkëpunimit të vazhdueshëm, komunikimit të hapur dhe mbështetjes profesionale, ne ecim së bashku me prindërit në çdo hap, duke i fuqizuar ata me njohuri dhe mjete të nevojshme për të mbështetur progresin dhe mirëqenien e fëmijës edhe jashtë mjedisit terapeutik.
05
Gjithëpërfshirja
Në një shoqëri ku çdo fëmijë ka të drejtë të jetë i pranuar, i respektuar dhe i përfshirë, pavarësisht dallimeve dhe nevojave të tij individuale.Ne angazhohemi për të krijuar mundësi të barabarta për fëmijët dhe personat me autizëm, duke promovuar pranimin, mirëkuptimin dhe pjesëmarrjen e tyre aktive në familje, shkollë dhe komunitet.
06
Përgjegjësia dhe transparenca
Ne veprojmë me integritet, përgjegjësi dhe përkushtim të plotë, duke vendosur gjithmonë mirëqenien, zhvillimin dhe interesin më të mirë të fëmijës në qendër të çdo vendimi dhe veprimi që ne marrim. Ne angazhohemi për një qasje të hapur dhe profesionale në bashkëpunim me familjet, partnerët dhe komunitetin, duke garantuar transparencë, besueshmëri dhe standarde të larta në ofrimin e shërbimeve tona.
  • Çfarë Ofrojmë

Shoqata “AUTIZMI” përmes Qendrës së saj, ofron një gamë të gjerë shërbimesh të integruara dhe të specializuara, të cilat synojnë të mbështesin zhvillimin, pavarësinë dhe mirëqenien e fëmijëve me autizëm dhe çrregullime të tjera neurozhvillimore.

Vlerësime multidisiplinare 

Ofrojmë vlerësime profesionale nga fusha të ndryshme, përfshirë psikologjinë, logopedinë dhe ergoterapinë, me qëllim të kuptimit më të plotë të nevojave, aftësive dhe sfidave të secilit fëmijë, si dhe hartimin e rekomandimeve të përshtatura për mbështetje të mëtejshme. 

Programe terapeutike të specializuara 

Ofrojmë programe të individualizuara terapeutike, duke përfshirë Analizën e Aplikuar të Sjelljes (ABA/VB), DIR Floortime, terapinë logopedike dhe ergoterapinë, të përshtatura sipas moshës, nivelit të zhvillimit dhe nevojave specifike të secilit fëmijë. 

Mbështetje për familjet 

Familjet janë pjesë e rëndësishme e procesit të zhvillimit. Përmes, vizitave në shtëpi (Portage),  informimit, këshillimit profesional dhe orientimit, ne i mbështesim prindërit dhe kujdestarët për të kuptuar më mirë nevojat e fëmijës dhe për të fuqizuar rolin e tyre në procesin terapeutik. 

Ndërgjegjësimi i shoqërisë 

Angazhohemi në rritjen e ndërgjegjësimit dhe njohurive të shoqërisë për autizmin përmes aktiviteteve informuese, fushatave sensibilizuese dhe promovimit të rëndësisë së pranimit, përfshirjes dhe ndërhyrjes së hershme, të personave me autizëm.